უკრაინა და აშშ დღეს ხელს მოაწერენ მნიშვნელოვან შეთანხმებას

ვოლოდიმირ ზელენსკი თეთრ სახლს 28 თებერვალს ეწვევა, რათა აშშ-სთან იშვიათი სასარგებლო წიაღისეულის შესახებ შეთანხმებას მოაწეროს ხელი. შეთანხმება ითვალისწინებს: _ აშშ-ს წვდომას უკრაინის იშვიათ სასარგებლო წიაღისეულსა და სხვა ბუნებრივ რესურსებზე; _ უკრაინის რეკონსტრუქციის ერთობლივი ფონდის შექმნას. თუმცა, შეთანხმებაში არ შედის უსაფრთხოების გარანტიები, რასაც უკრაინა აშშ-სგან ითხოვდა. პრეზიდენტმა დონალდ ტრამპმა ხაზი გაუსვა ამ შეთანხმების ფინანსურ სარგებელს აშშ-სთვის, თუმცა, აღნიშნა, რომ უსაფრთხოების გარანტიების საკითხი ცალკე განიხილება. შეთანხმებაზე ხელმოწერა ვაშინგტონში, 2025 წლის 28 თებერვალს გაიმართება. აშშ-სა და უკრაინას შორის მიღწეულია წინასწარი შეთანხმება რეკონსტრუქციის საინვესტიციო ფონდის შექმნის შესახებ, რომელიც მიზნად ისახავს უკრაინის ომით დაზარალებული ეკონომიკის აღდგენას. მისი ძირითადი პუნქტებია: _ ერთობლივი მმართველობა: ფონდი იქნება აშშ-სა და უკრაინის მთავრობების მიერ თანასწორად მართული, რაც უზრუნველყოფს აღდგენით პროექტებზე ერთობლივ კონტროლს. _ შემოსავლის განაწილება: უკრაინა ფონდის ბიუჯეტში ჩარიცხავს სახელმწიფო საკუთრებაში არსებული ბუნებრივი რესურსებიდან (მათ შორის მინერალები, ნავთობი და ბუნებრივი აირი) მიღებული მომავალი შემოსავლის 50%-ს. ეს სახსრები მოხმარდება ქვეყნის უსაფრთხოებისა და კეთილდღეობის განმტკიცებას. _ რესურსების საკუთრება: შეთანხმების მიხედვით, უკრაინის ბუნებრივი რესურსები რჩება ქვეყნის საკუთრებაში და არ გადაეცემა აშშ-ს ან სხვა რომელიმე მხარეს. _ უსაფრთხოების გარანტიები: მიუხედავად იმისა, რომ აშშ მხარს უჭერს უკრაინას უსაფრთხოების გარანტიების მიღებაში, შეთანხმება არ შეიცავს აშშ-ს მხრიდან უშუალო სამხედრო ან უსაფრთხოების ვალდებულებებს. _ ევროპული ინტეგრაცია: შეთანხმება თანხვედრაშია უკრაინის ევროკავშირთან ინტეგრაციის ვალდებულებებთან და არ ეწინააღმდეგება ევროკავშირის ან სხვა ფინანსური ორგანიზაციების მოთხოვნებს. _ აშშ-სა და უკრაინის პრეზიდენტები ვაშინგტონში ხელს მოაწერენ შეთანხმებას, რაც კიდევ უფრო გაამყარებს ორ ქვეყანას შორის ეკონომიკურ პარტნიორობას. მასალა მომზადებულია axios.com, theguardian.com, thetimes.co.uk-ის ინფორმაციებზე დაყრდნობით.