საზღვარზე მიგრანტების გადაყვანის და საზღვრის უკანონოდ გადაკვეთის ფაქტზე 4 პირი  დააკავეს

საქართველოს სახელმწიფო საზღვარზე მიგრანტების გადაყვანის და საქართველოს სახელმწიფო საზღვრის უკანონოდ გადაკვეთის ფაქტზე 4 პირი დააკავეს. "შინაგან საქმეთა სამინისტროს სასაზღვრო პოლიციის, საპატრულო პოლიციის დეპარტამენტის და ფინანსთა სამინისტროს შემოსავლების სამსახურის საბაჟო დეპარტამენტის თანამშრომლებმა, ბოლო პერიოდში ერთობლივად ჩატარებული ოპერატიული ღონისძიებებისა და საგამოძიებო მოქმედებების შედეგად, უცხო ქვეყნის 4 მოქალაქე: 1987 წელს დაბადებული ე.ნ., 1966 წელს დაბადებული მ.ე., 1989 წელს დაბადებული მ.შ. და 1997 წელს დაბადებული ქ.ბ. საქართველოს სახელმწიფო საზღვარზე მიგრანტების გადაყვანის და საქართველოს სახელმწიფო საზღვრის უკანონოდ გადაკვეთის ფაქტზე დააკავეს. გამოძიებით დადგინდა, რომ უცხო ქვეყნების მოქალაქეებმა, ე.ნ.-მ და მ.ე.-მ საკუთარი მართვის ქვეშ არსებულ სატვირთო ავტომანქანის მისაბმელში მოწყობილი სამალავის მეშვეობით, სასაზღვრო გამტარი პუნქტი „სარფის“ გავლით თურქეთის რესპუბლიკიდან მიგრანტები, ასევე, უცხო ქვეყნების მოქალაქეები მ.შ. და ქ.ბ. საქართველოში უკანონოდ გადმოიყვანეს. დანაშაული 5 წლამდე ვადით თავისუფლების აღკვეთას ითვალისწინებს. გამოძიება საქართველოს სისხლის სამართლის კოდექსის 344-ე მუხლის 1-ლი ნაწილით და 344 -პრიმა მუხლის 1-ლი ნაწილით მიმდინარეობს",_ აცხადებს საქართველოს სასაზღვრო პოლიცია.