მოლაპარაკებები გრძელდება _ თეთრი სახლის თქმით, უიტკოფი პუტინთან მიმდინარე კვირაში ჩავა

თეთრი სახლის პრესმდივნის, კეროლაინ ლევიტის განცხადებით, დონალდ ტრამპის სპეციალური წარმომადგენელი სტივ უიტკოფი ამ კვირაში რუსეთში, ცეცხლის შეწყვეტის შესახებ მოლაპარაკებების გასამართად, გაემგზავრება. მისი თქმით, აშშ-ის პრეზიდენტი აქტიურად აკვირდება მოლაპარაკებების მიმდინარეობას და უკრაინაში ომის დასრულებას "ერთ-ერთ მთავარ პრიორიტეტად" მიიჩნევს. პრესმდივანმა ხაზი გაუსვა იმას, რომ მოლაპარაკებების პროცესი "სწორი მიმართულებით ვითარდება". "სპეციალური წარმომადგენელი სტივ უიტკოფი ამ კვირის ბოლოს რუსეთში დაბრუნდება, რათა ვლადიმერ პუტინთან მოლაპარაკებები განაგრძოს", - განაცხადა ლევიტმა. ამასთან, ლევიტმა არ დააკონკრეტა, თუ როდის განხორციელდება ვიზიტი. ცნობისთვის, უიტკოფი რუსეთში 11 აპრილსაც იყო, სადაც ვლადიმერ პუტინთან დახურულ კარს მიღმა შეხვედრა გამართა.