“მეუღლე და სამი მცირეწლოვანი შვილი მყავს ჩარჩენილი, ძალიან გთხოვთ, რამე ქენით”

რაჭაში, შოვში, სტიქიის ზონაში ახალგაზრდა კაცი მეუღლესა და სამ მცირეწლოვან შვილს ეძებს. კაცი ამბობს, რომ ოჯახს ბოლოს დღის 12-1 საათისკენ ეკონტაქტა, მას შემდეგ კი ვეღარ უკავშირდება: „მეუღლე და სამი მცირეწლოვანი შვილი მყავს ჩარჩენილი. არ ვიცი, რა სიტუაციაა და როგორ არიან. ხალხო, ძალიან გთხოვთ, რამე ქენით“,- ამბობს ის. სტიქიის ზონაში, სამაშველო ღონისძიება მთელი ღამის განმავლობაში, უწყვეტ რეჟიმში გაგრძელდება, _ ამის შესახებ განცხადება შსს-მ გაავრცელა. სამაშველო ღონისძიებაში ჩართულია 400-მდე მეხანძრე-მაშველი და შინაგან საქმეთა სამინისტროს შესაბამისი დანაყოფების წარმომადგენლები. ონის მუნიციპალიტეტში, კერძოდ, კურორტ შოვში სტიქიის შედეგად მიწის მასა ჩამოიშალა. შემთხვევა სასტუმრო „სანსეტ შოვის“ მიმდებარედ მოხდა. 70-მდე მოქალაქე უსაფრთხო ადგილზეა გადაყვანილი.